Unha obra teatral para bebés no Punto de Atención de Sandiás

A historia do osiño Babá bebé encheou a pequena escola do Punto de Atención Infantil de Sandiás de cores, de aromas e de música. Todo feito con moito detalle e amabilidade, moi ben estruturada a obra teatral, o que fixo en todo momento partícipes aos pequenos e que saltaran unha e outra vez ao escenario a participar do propio relato. E os bebés coas miradas atentas a todo o que acontencía: a bola que cambiaba de cor, os diferentes sons… e querían tocar todo o que se lles ofrecía, a sorpresa das pompas de xabón e as familias cantando e aplaudindo a canción de “ Baba Bebé Bebé, Babá...”.

Os destinatarios foron nenos e nenas de 0-3 anos. Tratouse dunha obra de pequeno formato moi estimulante na que bebés e familias se mergullan nun espazo acolledor, seguro e propicio para desfrutar do paso das estacións, que se inicia nunha primavera na que podemos observar e sentir o reino vexetal que comeza a medrar e un osiño que esperta, para despois pasar polo verán coa súa calidez e un mar que nos abraza, o ocre do outono e finalmente o frío inverno, onde o osiño se bota a durmir, descansando.