Programa da 46 Romaxe de Lodoselo: xantar e música

Este sábado 14 de setembro, a Asociación Irimia organiza a XLVI Romaxe de crentes galegas e galegos, no campo da Lama de Lodoselo. O programa comeza ás 11:00 horas cunha acollida e petiscos. Ao mediodía, ás 12:00 horas, a celebración acompañada pola música de A Quella. Ten lugar posteriormente un xantar compartido, animando a sobremesa cunha foliada e distintas actuacións musicais, ata que ás 18:00 horas sexa a clausura do acto.

A organización recorda que se o tempo non é favorable, os actos serán no pavillón polideportivo. Dende a primeira Romaxe de crentes galegas e galegos, Irimia sempre reivindicou e denunciou as situacións sociais que se dan no país, así como apoiou e puxo en valor as pingas de choiva que en cada lugar coidan da Terra.

Este ano quere facer fincapé nun pensamento coidadoso: “Non decidir nunca polos demais. A comunidade ao servizo da comunidade. Apoiando iniciativas de axuda mutua entre a veciñanza. O coidarme, coidarte, coidarnos como xeito de ser e estar no noso medio”.

A primeira Romaxe naceu a carón do Pedregal de Irimia, e foi percorrendo diferentes lugares de Galicia. Dende entón, a Asociación Irimia camiña participando en varias iniciativas. A Romaxe reúne cada ano a centos de persoas nunha singular romaría itinerante.