A Romaría da Saínza de Rairiz de Veiga estrea un festival musical para a xente nova

O concello de Rairiz de Veiga xa conta os días para o inicio da Romaría da Saínza, que se celebrará os vindeiros 20, 21, 22 e 24 de setembro.

Contará cunha programación para tódolos públicos na que destaca o festival de música Saínza Soundscape, coa discoteca móbil EME Music e Carlos Magán, e que segundo a alcaldesa, Asunción Morgade, supón “un chisco á nosa xuventude”.

A Saínza é unha festividade coñecida sobre todo pola recreación do enfrontamento de mouros e cristiáns, unha das máis senlleiras da Limia “e de Ourense e Galicia, coa que se despiden as grandes festas do verán”, apunta Morgade.

Máis aló da batalla, a programación complétase con actuacións musicais de “orquestras de grandísimo nivel nacional”.

Morgade convida a todos a asistir á Romaría da Saínza, e lembra que “non hai mellor xeito de vivila que desfrutar do entorno natural que nos ofrece a Carballa da Rocha”.

Programación

A programación comeza o venres ás 13,00 horas coa descarga de bombas de palenque, e xogos populares pola tarde. Á noite, logo da actuación da Banda de Gaitas de Rairiz no Campo da Festa ás 22,00 horas, arrincará o primeiro festival Saínza Soundscape.

O sábado, ás 19,30 horas, terá lugar a procesión da Nosa Señora da Mercé. trala que actuará a orquestra Triunfo en dous pases. Ás 23,45 horas desfilará o exército cristián dende a capela da Saínza ata o campo de batalla. Á medianoite, os mouros protagonizarán o asalto ao Castelo. A noite rematará coa discoteca móbil Gramola ás 2:00 horas.

O domingo haberá unha alborada con Los Támega. Ás 11:30 horas, procesión dende a igrexa de Rairiz de Veiga ata o Castelo da Saínza, acompañada pola Banda de Gaitas de Rairiz. Ao remate, comezará a misa no campo de batalla para dar paso ao combate entre mouros e cristiáns ás 12,45 horas. Traña sesión vermú, ás 14,00 horas, á tarde a orquestra Olympus actuará ás 18,30 e ás 19,45 horas