Sandiás alíase para loitar contra o despoboamento

O Concello de Sandiás vén de asinar un acordo de colaboración xunto co Centro de Desenvolvemento Rural (CDR) O Viso co obxectivo de unir forzas contra o despoboamento, unha das ameazas ás que se enfronta este municipio da comarca da Limia, que no ano 2023 contaba con 1.134 habitantes segundo o INE.

A acción prevista, que conta co financiamento do Ministerio para a Transición Ecolóxica e o Reto Demográfico, consistirá en pór en contacto a familias interesadas en emprender proxectos familiares no rural con persoas propietarias de casas ou negocios dispoñibles para alugar ou vender.

Nas vindeiras semanas está previsto que o equipo de facilitación rural do CDR visite as tres parroquias do Concello para informar á veciñanza e resolver calquera dúbida ou inquedanza que puideran ter sobre esta iniciativa. Para o alcalde de Sandiás, Felipe Traveso, “é unha oportunidade de intentar que haxa máis xente nos pobos, vivindo nas casas que agora están pechadas”.

O Viso leva desenvolvendo accións específicas contra o despoboamento dende o ano 2018. Camilo Vila, responsable destas iniciativas, asegura que “nos últimos anos chegaron 35 familias á comarca, e o reto é ter máis casas onde poder facer vida”.

Participación

Alén de todo isto, a páxina web do Concello incluirá, no seu apartado de Servizos, un acceso nomeado “Despoboamento”, con toda a información necesaria para participar nesta iniciativa, tanto para as familias que viven en zonas urbanas e queren trasladarse ao medio rural, como para persoas propietarias de casas ou negocios que queiran formar parte do proxecto.