Merenda saudable no CDR O Viso grazas ao emprego da Biocociña

Terían que encargarse de elaborar unha merenda para a despedida de fin de curso dos grupos de ximnasia e memoria que oCDR leva a cabo en Lodoselo.

As integrantes, Lourdes Augusto, Xiana Carballo e Lourdes Sotelo, levan tempo traballando e aprendendo as claves sobre a alimentación saudable. E esta merenda foi a oportunidade perfecta para que puxeran en práctica todos os coñecementos adquiridos.

Non faltaron os pinchos de froita, nin as framboesas de tempada, pero tampouco pratos salgados coma tortillas e embutidos elaborados por elas. Debido á importancia da cita, as expertas en Biocociña puxeron todo o seu empeño para que a pequena festa de peche de curso saíra ben.

E vista a velocidade coa que a xente deu conta da mesa chea cos deliciosos aperitivos preparados por todas elas, poderíase dicir que pasaron a proba con éxito.

Ven favorecida a súa valoración persoal

Dende a dirección do CDR subliñan que as compoñentes deste grupo non só adquiran coñecementos sobre unha boa alimentación, senón que tamén vexan favorecida a súa valoración persoal grazas ao reforzo positivo que lles ofrece a xente coa que interactúan. De aí a importancia das festas e xuntanzas en comunidade.

Esta acción enmárcanse no proxecto Biocoidados, vinculado ao Plan de Recuperación Transformación e Resiliencia do Ministerio de Dereitos Sociais e Axenda 2030 e financiado pola Unión Europea.