O Centro de Desenvolvemento Rural (CDR) O Viso fai balance da celebración da segunda edición das Olimpíadas Rurais Interpobos, celebradas o primeiro fin de semana de setembro no parque do Toural de Xinzo de Limia. “A pesar do día e da choiva, vivimos unha xornada de xogo, convivencia, competición e comunidade que bateu récords de participación”, explican dende a entidade.
Esta cita, organizada polo CDR O Viso en colaboración co colectivo RAS, a actividade enmarcouse no Programa Iniciativa Xove da Dirección Xeral de Xuventude, Participación e Voluntariado, polo que se realizou co financiamento da Consellería de Política Social e Xuventude e coa colaboración do Concello de Xinzo de Limia.
Esta segunda edición celebrouse con máis participantes que a anterior, un total de 12 equipos que viñeron de diferentes municipios da comarca de A Limia para competir entre eles, pero co obxectivo principal de “convivir, constatando a consideración, o entusiasmo, a militancia que compromete e que se vive no rural limiao”, din dende a organización.
Ante a gran acollida, dende o CDR O Viso xa están a preparar as III Olimpíadas Rurais, tras o “orgullo e gratitude que sentimos nesta segunda edición, pois a resposta dos veciños que se achegaron ao Toural, para competir, ver e compartir foi moi boa, tendo en conta o mal tempo que facía”, sinala a entidade rural, sen esquecerse de agradecer “a colaboración dos clubes, entidades e negocios locais do ámbito do deporte”.
