Os concelleiros limiaos celebrarán hoxe martes, a partir das 09,00 horas, o último pleno do ano e un dos máis importantes, pois nel someteranse a aprobación os orzamentos para traballar durante o vindeiro exercicio económico de 2023.
Dende o Consistorio adiantaron a contía final: 8.053.00 euros, no apartado de gastos -onde se contemplan no capítulo de persoal 4.339.467 euros, un 53,88 por cento do total, e un gasto corrente de 2.738.039 euros, o 34 por cento do total-. No tocante aos ingresos, a previsión é de 8.111.777 euros. Mantense vixente a obligatoriedade de reducir un dous por cento os gastos por mor do plan de axuste.
Por outro lado, na sesión plenaria nomearase, a título póstumo, a Ramón de la Fuente Galván como fillo predilecto de Xinzo pola súa traxectoria e dedicación ao concello, tanto na súa faceta profesional como médico como na súa actividade política.
Na orde do día tamén se inclúe a ratificación da terceira adenda modificativa do convenio entre a Confederación Hidrográfica Miño-Sil e o Concello de Xinzo de Limia para as actuacións das infraestruturas hidráulicas asociadas ao Mosteiro de Bon Xesús de Trandeiras.
No apartado de mocións, o goberno local proporá unha serie de demandas para mellorar a atención sanitaria en Xinzo.
