Xinzo instala tres puntos de intercambio de libros

O Concello de Xinzo, para promover a lectura entre os seus veciños, vén de instalar tres puntos para o intercambio de libros nos parques infantís do Pombal, Toural e Galicia.

A iniciativa, que comezou con varios exemplares de literatura xuvenil e infantil, leva por nome “Trocalibros” e, ao tempo que procura espallar a cultura pola vila, trata de que os visitantes gocen dos entornos máis senlleiros da localidade. A mecánica consiste en coller libros de xeito gratuito ao tempo que se depositan outros no seu lugar.

A alcaldesa de Xinzo de Limia, Elvira Lama, supervisou as casetas vermellas instaladas nos mencionados puntos acompañada do edil de Infraestruturas, Rafa Penabad, e do técnico de Cultura de Xinzo, Alfonso Carlos Lois. A rexedora prevé que a iniciativa teña unha moi boa acollida xa que, segundo subliñou, “as casetas instaláronse o venres ao mediodía e, pola tarde, xa había nenos intercambiando libros”. Tamén estarán a disposición dos afeccionados á lectura dúas maletas viaxeiras con literatura nas piscinas exteriores.