Allariz ofrece "dez oportunidades" para coñecelo

Neste mes de marzo regresan a Allariz os roteiros temáticos que permiten descubrir a vila a través da súa historia. Serán sete temáticas repartidas en dez datas: A primeira o sábado, 18 de marzo, e a última o vindeiro 16 de decembro.

A Concellería de Promoción económica da man de Xeitura impulsa esta nova etapa de roteiros que levarán por título “Dez oportunidades para coñecer Allariz”. María López, concelleira de Turismo e Manuel Gallego e Noemí Álvarez, ambos técnicos de Xeitura, presentaron as datas e os nomes de cada unha das actividades este mércores na vila alaricana. A primeira data terá como título “As mulleres de Nós percorren Allariz” e arrancará ás 17,00 horas da tarde. O 15 de abril, á mesma hora, será a quenda de “A lingua das bolboretas. Tempos de guerra”. “Lendas e segredos de Allariz” contará con dúas datas: O 20 de maio e o 14 de outubro, ambas ás 17,00 horas.

Por outro lado, haberá dúas oportunidades para disfrutar do roteiro sobre “Os xudeos en Allariz”: Unha o 17 de xuño, ás 20,00 horas; e outra o 16 de decembro, ás 17,00 horas.

Unha das temáticas será teatralizada. Tratarase de “Quen levou as pedras do castelo?” e poderase asistir tanto o 15 de xullo, ás 20,00 horas, como o 19 de agosto, á mesma hora.

As dúas últimas temáticas serán “O castelo invisible” -16 de setembro, ás 20,00 horas- e “Imos de museos” -18 de novembro, ás 17,00 horas-.

Os roteiros serán gratuitos ata completar aforo e, para participar, será necesario inscribirse en informacion@allariz.gal. “Estes roteiros pensáronse para aquelas persoas que, sendo coñecedoras ou non de Allariz, queren descubrir fermosos recunchos, interesantes curiosidades e anécdotas, dende o punto de vista dunha temática en particular”, explicou María López, durante a presentación feita en Allariz.