O alcalde de Maceda, Rubén Quintas, reuniuse co presidente da Deputación, Manuel Baltar, co obxectivo de analizar diversas melloras para a localidade que goberna, especialmente, en materia deportiva.
Entre outras propostas, ambos representantes institucionais chegaron a un acordo específico para levar a cabo a construción dun parque de habilidades ciclistas ao pe do castelo, vinculado ao Club Ciclista Maceda, e para mellorar as instalacións do campo de fútbol municipal.
O presidente do organismo provincial valorou o encontro como “realmente útil” para fortalecer a liña de traballo entre institucións e reiterou o seu compromiso para os dous proxectos mencionados: “Esta é unha nova mostra da capacidade propositiva de Rubén Quintas e do seu liderado en Maceda, sempre na procura de mellores servizos públicos para os veciños e cun marcado caracter innovador”. O presidente da Deputación incidiu, do mesmo xeito, na aposta do Concello de Maceda polo fomento do deporte de base, “apoiado no éxito de entidades como o Club Ciclista Maceda e cuestións clave como a calidade das infraestruturas públicas que ofrece” e que agora se ve “referendada nesta nova cooperación da Deputación”.
130 BENEFICIARIOS
Deste novo acordo, veranse beneficiados máis de 130 cativos, no caso do circuito ciclista, e 240, no tocante ao campo de fútbol, tal e como subliñou o alcalde de Maceda, Rubén Quintas.
O alcalde de Maceda reivindicou a “estreita colaboración, incondicional coa Deputación de Ourense, que nos permite seguir avanzando no impulso ao deporte”.
