A concelleira de Servizos Sociais destacou a participación desta nova entrega, dirixida ao empoderamento
A segunda edición de Espazo Mulleres, organizado polo Centro de Información á Muller de Maceda e polo propio Concello co obxectivo de promover a creación de redes de apoio mutuo entre mulleres nun espazo compartido de formación, saúde, autocoidado, autoestima e empoderamento; chegou ao seu fin cun Obradoiro de Elaboración de conservas, xabóns e cosméticos naturais.
A iniciativa desenvolveuse entre os meses de maio e outubro, periodo no que se levaron a cabo diversos obradoiros -con disciplinas e técnicas diversas e cun enfoque eminentemente práctico e vivencial- para as mulleres, dirixidos tamén á mellora da súa empregabilidade ou á expresión da propia creatividade. A Concelleira de Servizos Sociais, Dependencia e Medioambiente, Ana María Rodríguez Blanco -que agradeceu a participación na iniciativa-, destacou “a boa acollida que tivo o programa, no que participaron mulleres doutros concellos”, sinalando que “se programaron as actividades tendo en conta a resposta das mulleres na edición anterior; e tamén se incorporaron outras novas, que tiveron moita aceptación, manténdose o aforo completo en todas elas”.
