Mil euros en premios tan só por comprar en Allariz

O Concello de Allariz presentou onte, en colaboración co sector do comercio e a hostalería local, a súa campaña de Nadal baixo o lema “O Peto dos Desexos”. Esta iniciativa, que busca incentivar as compras locais e dinamizar a economía da vila alaricana durante a época festiva, ofrece un total de 1.000 euros en premios entre tódolos participantes. A campaña dará comezo mañá e estenderase ata o vindeiro 6 de xaneiro, ambos días incluídos.

O importe total que se repartirá distribúese en dous premios de 250 euros e cinco de 100 euros. Para participar, os clientes dos establecementos comerciais e de hostalería de Allariz deberán xuntar tíckets de compra ata sumar un valor total de 30 euros e depositalos, xunto coa “Tarxeta dos Desexos”, nun dos dous Petos dos Desexos, situados no Alto do Portelo e na Alameda.

Ademais tódalas compras que se realicen durante este período entrarán automaticamente no sorteo, que terá lugar o 8 de xaneiro, ás 11:00 horas, nun acto público no Alto do Portelo. As bases do sorteo están dispoñibles en allariz.gal/nadal.

Cristina Cid, alcaldesa de Allariz, e María López, concelleira de Comercio, destacaron a importancia de apoiar o comercio local. “Mercar en Allariz sempre ten premio, porque ademais de dinamizar a nosa economía local, estamos axudando ás nosas veciñas e xerando emprego. É responsabilidade de todos mercar de xeito responsable para contribuír ao crecemento do sector,” sinalaron.

Decoración de Nadal

Esta campaña complétase cunha serie de actividades e unha coidada decoración de Nadal, cuxa estrea terá lugar esta noite, a punto para a ponte festiva, e coa que se busca atraer visitantes e crear un ambiente único para o comercio e a hostalería locais.