O Grupo de Emerxencias Supramunicipal de Maceda recibiu este luns, da man do delegado territorial da Xunta de Galicia en Ourense, Gabriel Alén, e do xerente da Axencia Galega de Emerxencias, Marcos Araújo; un equipo de excarceración valorado en 57.000 euros e destinado a atender determinadas intervencións como accidentes de tráfico con persoas atrapadas, rescates en espazos confinados ou outras estruturas colapsadas.
Dito equipo serve para calquera tipo de emerxencia de salvamento ou rescate onde sexa necesario empregar ferramentas hidráulicas de corte, separación, tracción e elevación. Consta dos elementos precisos para a intervención en rescate como unha bomba hidráulica con motor de combustión, catro mangueiras hidráulicas, dous puntais de estabilización, ou un protector de Airbag, entre outros elementos.
