O núcleo de San Cristovo, en Paderne de Allariz, mellorará o seu sistema de abastecemento grazas a un convenio entre o Concello e a Consellería de Infraestruturas e Mobilidade por valor de 275.000 euros -a primeira aportará o 20 por cento da contía total e a segunda o restante, o 80 por cento-.
Na xornada deste xoves, a Administración Autonómica remitiu a proposta de acordo que solventará as deficiencias existentes neste ámbito. Na actualidade e tal e como explicaron dende a Xunta, o concello de Paderne de Allariz conta cunha rede de abastecemento que dá subministración a todos os núcleos do municipio salvo a San Cristovo. Isto é debido a que o depósito de cabeceira se atopa a unha cota inferior ao dito núcleo, polo que a súa poboación abastécese na actualidade a través de acometidas particulares ou colectivas.
Dende Augas de Galicia búscase solucionar os problemas descritos a través da execución dunha rede de abastecemento composta por conexión con rede existente, bombeo, novo depósito, impulsión de subministración e unha rede en árbore para distribución.
Estes traballos contarán cun prazo de execución de 5 meses e o Concello de Paderne asumirá a realización das xestións pertinentes para posibilitar a súa execución, así como a recepción, mantemento e conservación das actuacións.
