Bieito Ledo recibirá o premio “Celanova, Casa dos Poetas”

O Padroado da Fundación Curros Enríquez acordou onte, por unanimidade, concederlle o premio “Celanova, Casa dos Poetas” a Bieito Ledo, pola súa contribución á cultura galega “desde o ámbito da xestión cultural, da edición e de propostas que procuraron sempre o afondamento nas nosas raíces dende a súa aldea de Padroso”, recolle o fallo do xurado, presidido polo presidente Antonio Puga. Nel destácase o traballo en prol da cultura e da convivencia feito dentro todos os ámbitos por este “ourensán universal”, tamén polas súas achegas ao mundo editorial e ao saber cultural e científico, co legado enciclopédico da editorial Ir Indo e os Premios da Crítica Galicia. A cuadraxésima edición do certame, cuxo acto de entrega terá lugar o primeiro domingo de setembro, por ser a data máis próxima ao aniversario de Celso Emilio Ferreiro, sorprendeu e emocionou a partes iguais ao seu protagonista. “Hoxe medro por dentro. Isto é unha marabilla. Unha gran honra, un alto honor que para nada me esperaba. Primeiro porque leva o nome de Celanova e esa Casa dos Poetas do gran Curros Enríquez que, xunto a Rosalía de Castro, foron os que inventaron dalgunha maneira Galicia, tamén de Celso Emilio Ferreiro a quen tratei en Vigo, de Méndez Ferrín…”, dixo Bieito Ledo, quen trasladou o seu agradecemento aos membros do xurado ao decantárense por el entre as diferentes propostas. Faro cultural No transcurso da reunión, que por espazo de dúas horas citou na sala da lareira a representantes do Concello de Celanova, da Consellería de Cultura, da Deputación de Ourense, da Real Academia Galega, do Consello da Cultura, da Universidade de Vigo e outros patróns a título individual no cal se estreou o poeta celanovés Baldo Ramos, aprobáronse as contas e actividades de 2023, entre outros asuntos internos da entidade. Ana Díaz, Juan Maceiras, Antonio Puga, José María Paz Gago e Juan García na presentación do “Gran libro do Cocido Galego”. A Casa dos Poetas seguirá sendo neste ano o epicentro da actividade cultural das Terras de Celanova, acollendo novas exposicións, conferencias, obradoiros e presentacións, como a que onte mesmo protagonizaba José María Paz Gago co “O gran libro do Cocido Galego”, na que estivo acompañado de Ana Díaz, Juan Maceiras, Antonio Puga e Juan García. Entre as novidades para 2024 destaca a recuperación da Ruta Currosiana, que unía os lugares mencionados por Curros Enríquez nos seus poemas de “A Virxe do Cristal”, “O gueiteiro” e “Unha boda en Einibó”. O obxectivo da entidade pasa por “reforzar as propostas de actividades literarias con roteiros destinados a escolares, grupos e visitantes en xeral”, reformulando dito itinerario e promocionando o roteiro urbano “Poemas na rúa”. Ao longo de 2023, a Fundación Curros Enríquez atendeu a 13.780 persoas, destacando a recepción de máis de 3.000 visitantes atendidos só en grupos por asociacións e axencias de viaxe; e a 3.800 escolares que participaron no programa “Ven coñecer a Celanova de Curros e Celso Emilio”. De cara ao 20 aniversario da apertura da Casa dos Poetas en 2026, presentouse unha memoria que recolle a proposta de reformas para o edificio ao que se engadirá un plan de musealización.