Cartelle, solidaria con África

Case 8.000 quilómetros separan Cartelle de Mozambique, o país lusófono do que regresaba hai uns días o concelleiro Daniel Fernández Carril no marco dunha visita organizada polo Fondo Galego de Cooperación e Solidariedade da que forma parte o municipio de Terra de Celanova, conxuntamente con outros 17 concellos da provincia de Ourense. O edil do PP de Cartelle é o tesoureiro do Fondo Galego, entidade sen ánimo de lucro composta por 98 municipios, ademais das deputacións de A Coruña, Lugo e Pontevedra, para erradicar as desigualdades nos países empobrecidos a través de proxectos de cooperación. “É incrible como, con menos cartos, alí se poden facer máis cousas”, comentaba o edil, quen destacaba como as pequenas achegas dos concellos galegos poden transformar a vida de centos de persoas ao outro lado do mundo, nesta ocasión con catro vivendas resilientes en Boane e a reparación e ampliación da cobertura dos servizos de auga e iluminación pública no municipio de Nhamatanda. As risas dos rapaces xogando nas rúas e a súa ledicia por recibir un balón de fútbol como agasallo e, sobre todo, a sorriso que ilumina os rostros dos mozambiqueños, son o resumen que Dani Fernández fai do seu viaxe ao país. Unha viaxe na que estivo acompañado polo presidente da entidade e alcalde de Nigrán, Juan González, e a conselleira de Benestar Social de Cambre, Lúa Sanguiñedo. “Tivemos a oportunidade de ver a execución dos proxectos que temos na zona, pero tamén para xuntarnos con outros colectivos e as autoridades locais”, resumía o edil, quen quedou abraiado pola grande desigualdade de clases nun país cun 55% da poboación en situación de pobreza. “É incrible poder visitar lugares así para darse conta de cal é a realidade, para abrir os ollos e ver o ben que vivimos aquí en Galicia, e en España”, dixo. A nova sobre a viaxe de Dani Fernández a Mozambique sorprendeu a moitos dos seus veciños, que descoñecían a participación de Cartelle no Fondo Galego. “O Concello fai unha pequena achega, segundo o número de habitantes pero, a vista está que con moitas pequenas achegas se poden facer grandes cousas”, comentaba Fernández Carril. Os municipios participantes no Fondo Galego acollen, a cambio, exposicións pictóricas ou de fotografías sobre os proxectos que se desenvolven en Mozambique, Guinea-Bissau, Cabo Verde, Brasil ou Bolivia, e mesmo os empregados municipais teñen a posibilidade de participar no programa “Vacacións con traballo”, matizaba o edil.