Fuxan os Ventos, Premio Música Galega de Rebulir

Xosé Luis Méndez Ferrín, Celso Fernández Sanmartín e Fuxan os Ventos foron os galardoados dos Premios Rebulir da Cultura Galega 2022. Logo das dúas primeiras xornadas de actividades paralelas, a gala central celebrouse en Ramirás, completando o aforo do pavillón Picouto.

O evento estivo conducido polo actor e productor verinense Rubén Riós e pola comunicadora limiá Patricia F. Santana. No transcurso da gala actuaron os grupos Zes Pereiras, de Portugal; Coros y Danzas de Huéscar, de Andalucía; Inanga Rapa Nui, de Chile; e Ritmos e Costumbres, de Perú; ademais do grupo local, Rebulir.

Á gala acudiron diferentes autoridades estatais, autonómicas e provinciais entre as que se encontraban Miguel Ángel Santalices, presidente do Parlamento de Galicia; Román Rodríguez, conselleiro de Cultura, Educación e Universidade; Emilio Afonso, subdelegado do Goberno estatal en Ourense; Anxo Lorenzo, director xeral de Cultura; Rosendo Fernández, vicepresidente primeiro da Deputación; María Baleato, subdirectora da Secretaría Xeral de Emigración; e Isabel Gil, alcaldesa de Ramirás, entre outros.

O escritor Xosé Luis Méndez Ferrín recibía o Premio Homenaxe, que recolleu o seu amigo Xoán Carlos Domínguez. Outro dos momentos cume da gala foi a entrega do Premio Música Galega ao grupo Fuxan os Ventos e tras eles, os artistas Alba Faro e Álvaro Pérez interpretaron “O carro” e “Sementeira”. Miguel Ángel Santalices entregaba o Premio Artes Escénicas a Celso Fernández Sanmartín “Celsiño”.