PP e BNG tildan de “tasazo” a suba do lixo en Celanova

PP e BNG votaron onte en contra da suba do recibo do lixo proposta polo goberno municipal conformado por CD e PSOE. O incremento ata os 85 euros no rural e 108 na vila e que saíu adiante co voto de calidade do alcalde Antonio Puga, foi froito do acordo acadado no seo da Mancomunidade Terra de Celanova -no que está delegado o servizo de recollida de lixo de 8 dos 10 concellos da comarca- para asumir a suba do canon de Sogama e tratar que non sexa deficitario.

A voceira de Celanova Decide, Sandra Feijóo, indicou que “ninguén quere esta suba, pero non queda outra”, dixo á vista dos informes da Mancomunidade, explicando a premura da aprobación para a súa entrada en vigor o 1 de xaneiro e que no 2025 traballarán nunha nova ordenanza con bonificacións “con criterio e estudos previos”, dixo. Pola súa banda, a socialista Tere Barge lamentou ter que aplicar unha suba que vén marcada por unha transposición europea “pero é consecuencia dun comportamento e de non tomar en serio o que nos vén encima”, dixo.

Pablo Pérez, voceiro do PP, pediu sen éxito que se retirase o punto da orden do día “ata que haxa un informe real e eficiente”, despois de sinalar que o cálculo feito está baseado “nun informe previo e provisional da Mancomunidade á espera do informe da Deputación“, dixo tildando de “tasazo” unha suba que non contempla o canon de Sogama bonificado pola Xunta nin os posibles ingresos do Fondo de Compensación Ambiental. Pérez instou a traballar na elaboración dunha nova ordenanza que xa contemple as bonificacións. A nacionalista Ernesta Seoane tamén rexeitou o “tasazo” e o modelo da Xunta de queimar o lixo, propoñendo buscar alternativas na reciclaxe, tal e como manda a normativa europea.

Horas extra

O alcalde comentou que houbo varias reunións no seo da Mancomunidade onde se abordaron diferentes cuestións, mesmo o traslado do servizo á Deputación, e finalmente todos os rexedores acordaron fixar en 85 euros o recibo normal. Asemade, lembrou que a suba non será suficiente para facer fronte ao custe real do servizo, cuxa diferencia abonará o Concello.

Na sesión aprobouse a instalación dun punto da Policía Nacional e senllas modificacións para abonar as horas extra da Policía Local e para obras no rural.