“Fai falta máis Entroido de calle, é onde está a revolución da festa"

Miguel Ángel Prieto, "entroideiro de nacemento", pronunciará o pregón da festa verinesa o domingo de Corredoiro. Tamén é o protagonista do documental "O noso Entroido", que se proxectará o sábado 15 no Auditorio municipal.

Que significa para vostede dar o pregón de Entroido na súa vila natal?

Para min, como entroideiro verinés de toda a vida, é un orgullo. Estou tamén contento porque o Concello iniciou a liña de escoller pregoeiros da vila e por eso me motiva máis.

Por que cre vostede que é importante que se aposte por xente da vila para facelo?

Eu non lle quito mérito aos que viñeron antes e que eran de fora: personaxes públicos, da televisión, da cultura ou de outros ámbitos, pero penso que o máis lóxico é que o pregón do Entroido dun pobo o pronuncien os entroideiros do pobo, que son os que saben as comedias, as tramas e as cousas dos seus veciños. Creo que é máis interesante.

Xa o ten preparado, ou vai a tirar de improvisación?

Un pouco de todo. A ver, o pregón non pode ser unha cousa improvisada. Si hai algo de improvisación, pero tamén de comedia, de absurdo e de emoción.

Vostede defínese a si mesmo coma un entroideiro, ¿que é ser un entroideiro en Verín?

Eu son un neno do barrio vello de Verín, onde se fermenta o Entroido. Eu dende pequeniño xa o mamei ao estar en contacto cos antigos entroideiros: o "Cazoleiro", o "Cesteiro"... e moitos máis. Falo dos homes que nos deixaron o camiño feito e eu sígoo. A ver se os novos que veñen detrás seguen o noso.

En Verín hai relevo xeneracional para poder manter a tradición?

O máis importante para min é o desfile dos cativos, o xoves de Comadres pola mañá. Eses nenos son os que van a seguir a tradición e aos que hai que meterlle o virus do Entroido. O que hai que facer tamén é comedia na calle, ¡falta Entroido de calle! Máis parodias...

Estase perdendo o Entroido de rúa?

Non se está perdendo, pero deberíamos ser moitos máis facendo o Entroido na calle, con parodias, disfraces, inxenio e imaxinación. A revolución do Entroido está na rúa, sempre foi e sempre será.

Houbo un pouco de polémica esta semana por un cartel no que un local anunciaba a festa do Entroido cunha muller prácticamente espida, moitos dín que se trata dunha sátira. Como lle explicaría a alguén que non é de Verín a retranca do seu Entroido?

En primeiro lugar dicir que o cartel é do establecemento dun amigo meu, Antonio Fernández, alias "Cesteiro", un dos mellores entroideiros de Verín. Todo o que veña del é sano, non ten nada de veneno. Todo é sátira, é Entroido. Por outro lado, en Verín, cando chega o Entroido, entramos nunha catarse colectiva. Nos transformamos no que nos gustaría ser, en personaxes. Todos os verinenses somos entroideiros dende o principio ata o final, entón a calquera cousa lle sacamos punta, chispa, ironía ou un doble sentido, pero sen facerlle mal a ninguén.