Galicia exhibe proxectos sobre emprego en Uruguai

O conselleiro de Emprego, Comercio e Emigración, José González, acompañado polo secretario xeral da Emigración, Antonio Rodríguez Miranda, continúa a súa viaxe oficial pola Arxentina e O Uruguai, que o levou a reunirse co ministro de Trabajo y Seguridad Social uruguaio, Mario Aristi, para establecer sinerxías en materia de emprego tendo en conta non só o importante papel do empresariado galego afincado no país no desenvolvemento da súa economía, senón tamén as posibilidades de crecemento que ofrece a colaboración entre ambas administracións.

Entre as cuestións que trataron, na compañía tamén da delegada da Xunta no Uruguai, Elvira Domínguez Alonso, incluíuse a estratexia que fixo a Galicia merecedora do recoñecemento como Rexión Emprendedora Europea 2025. Dita estratexia, segundo explicaron os representantes galegos, fundaméntase en medidas como a Rede de polos de emprendemento e apoio ao emprego do Goberno autonómico que con 14 centros activos na actualidade está conseguindo dinamizar a economía galega e fixando poboación, especialmente no rural.

Así mesmo, os representantes do executivo uruguaio amosaron interese pola ferramenta EMi de intelixencia artificial pioneira en España e en Europa e que -aplicada nas 54 oficinas de emprego da nosa Comunidade- está axudar a casar oferta e demanda en tempo real, para dar resposta ás necesidades concretas de perfís profesionais das nosas empresas. O conselleiro e o secretario xeral da Emigración, xunto á delegada da Xunta, tamén mantiveron unha reunión con representantes da Asociación de Empresarios Gallegos del Uruguay (AEGU).