Entrevista a Daniel García e Álvaro Isaac Rúa, directores e compositores da Banda de Gaitas Nova Era da comarca de Verín, con motivo da saída do seu primeiro disco EP
A Banda de Gaitas Nova Era sacará mañá o single do seu novo traballo, "Outros Compases: Cara A", o seu primeiro EP -disco de reprodución extendida-, que verá a luz a principios de febreiro. Daniel García e Álvaro Rúa, directores da Banda falan do seu novo proxecto e o que supón este en época de pandemia.
Por que decide a Banda de Gaitas Nova Era sacar un EP?
Daniel: Decidimos crear o EP, con tres cancións, en vistas do que está acontecendo coa pandemia. Quixemos substituir a falta dos concertos enriba dun escenario con un pouco de música para a xente que nos segue. Tentamos demostrar que aínda que estamos en tempos complicados é posible seguir traballando e sacar proxectos á luz.
Que supón para o grupo sacar este EP?
Daniel: É unha motivación. Temos este problema que non depende de nós, pero si que depende seguir traballando, e iso é o que fixemos.
Cantas persoas participan na elaboración do disco?
Álvaro: É unha versión reducida de todo o que se pode reducir. Polas condicións moi pouca xente traballou no desenvolvemento do proxecto, agás no primeiro tema, porque o gravamos prepandemia e temos unha participación habitual.
Promocionaron o novo EP cun vídeo en redes. Que é o que tentan transmitir con este formato?
Álvaro: O 26 de decembro era a data na que tiñamos programado o concerto de Nadal e a celebración dos cinco anos da formación Nova Era, ante a imposibilidade de realizalo decidimos crear un vídeo que transmitira algo similar á sensación que podemos sentir cando subimos ao escenario e do outro lado do telón non hai ninguén. Este vídeo amosa esa sensación e a esperanza, tentamos substituír o traballo deste ano. Queremos transmitir que aínda que non poidamos facer os nosos concertos habituais, cambiamos o plan de ruta e sacamos algo novo, hai que reinventarse e buscar oportunidades ata nos peores momentos.
Ademais deste novo EP, en decembro fixo un ano do primeiro traballo discográfico de Nova Era, “Rumbo NE". Que supuxo isto para a Banda?
Daniel: Foi o primeiro traballo e un cambio grande para nós. Un reto que nos xerou moita ilusión. A pena foi que queriamos darlle máis difusión ao longo do 2020 e pola pandemia non puidemos, aínda así, aí está o traballo deixando constancia da nosa música.
Que supón crear música para Nova Era?
Álvaro e Daniel: É unha maneira de expresarse, desfrutámolo moito.
E nun futuro, cal será o camiño que seguirá a Banda de Gaitas?
Álvaro: O camiño de Nova Era sempre é incerto, pero sempre vai haber camiño. Vamos estar determinados co avance da pandemia, pero xa demostramos con este traballo que aínda que exista o problema do coronavirus, non nos vai frear e buscaremos outras alternativas. Non sabemos que será o próximo, pero seguramente completar esa Cara B do EP, quen sabe se con música, un documental, unha película...
A pesar de todo, é preciso buscar a motivación, como motivarían vostedes ao seu público?
Daniel: Que a música lles axude a pasar estes malos momentos, e que mellor maneira que escoitando a Nova Era.