O cartel do Entroido de Laza 2025 fusiona tradición e modernidade

O cartel gañador do Entroido de Laza 2025 foi escollido mediante un sistema que combinou o voto popular cos votos dos membros da comisión. A proposta elixida é obra de David Álvarez González, ilustrador natural de Viana.

O cartel, que leva por nome “Entroido, irmandade”, combina o debuxo a man co deseño por ordenador e amosa a tres dos principais protagonistas do entroido lazao: o peliqueiro, as formigas e A Morena.

O obxectivo do vianés Álvarez Rodríguez foi o de distanciarse doutros carteis anteriores, “que empregaban moito a fotografía”, para o cal pensou en “representar a tradición de bares de Laza como algo clásico e moi seu, para o que empreguei cores tipo madeira que reforzan a idea de pobo”.

Preguntado sobre o lema da súa ilustración, na súa opinión unha irmandade é “unha maneira conxunta de pensar, de ver e de crer dun grupo de xente”.

En canto a técnica, o deseño partiu dun “boceto a lapis, algo máis natural”, para despois pasalo a cor e darlle textura co uso dunha “tableta gráfica”. O cartel ademais ten un guiño “ao Guernica de Picasso”.

A programación avanza

Tras revelar o cartel do Entroido 2025, a comisión ten pendente unha reunión de traballo co Concello para colaborar como tódolos anos nos preparativos desta celebración. En canto á programación, fontes da comisión apuntan a que xa está “medio atada”.