Cualedro aprenderá sobre a orixe dos seus topónimos

ETIMOLOXÍA

Este vindeiro venres, 14 de xuño, ás 20,00 horas, a Casa da Cultura do Concello de Cualedro acollerá a primeira charla deste ano da campaña “Toponimízate. Falámosche dos nomes da túa terra”

Vicente Feijoo nunha charla da iniciativa “Toponimízate”.

Esta iniciativa de divulgación cultural, organizada pola Real Academia Galega (RAG) co apoio da Secretaría Xeral de Política Lingüística, quere achegar á veciñanza a historia que agochan os “microtopónimos”, que son os nomes particulares que reciben as leiras, fontes, camiños, devesas, lugares e ata pedras en Galicia.

A elección de Cualedro non é casual, xa que en só vinte anos este municipio perdeu un 30% dos seus veciños, e máis da metade dos cualedraos superan os 60 anos. De aí a importancia de acudir a lugares avellentados nos que a riqueza dos nomes dos nosos topónimos, moitos vencellados á oralidade, está en risco de desaparecer cos seus derradeiros habitantes.

O encargado de impartir a charla será Vicente Feijoo, natural do Riós e filólogo da RAG. Tamén é o coordinador técnico de “Galicia Nomeada”, o proxecto de recuperación da microtoponimia que conta dende o 2019 cunha plataforma online que lle permite á cidadanía colaborar na recolla e xeolocalización de todo tipo de microtopónimos da nosa xeografía, e que amosará e ensinará a usar na charla.

Feijoo leva “25 anos traballando coa toponimia galega”, e opina que é “unha mágoa” que non se lle dea a importancia que ten a recolla desta información “cultural que hai detrás dos nomes dos lugares, e que tanta información nos da sobre o que fomos e o que somos”.

O filológo ademais afirma que Galicia é un “caso único en Europa, pola cantidade e variedade da nosa toponimia”. Tamén afirma que a xente sae “sorprendida ” do que descubren e aprenden nas charlas, que asimesmo teñen por obxectivo que a xente se anime a subir á plataforma fotos e información sobre os topónimos da súa contorna. O experto da Real Academia recoñece que, polo de agora, “estamos moi contentos coa participación cidadá”.

Orixe de Cualedro

Segundo a documentación histórica medieval á que tiveron acceso os profesionais da RAG, o topónimo Cualedro aparecía referenciado como “corleto” e “corledo”, o que en latín sería “corileto” ou “Corylus”, é dicir, “abeleiras”.

Porén, o significado da etimoloxía do nome “Cualedro” provén probablemente da presenza de abeleiras na zona onde se asenta esta localidade.