ACTIVIDADES VITIVINÍCOLAS

A DO Monterrei recibe a xornalistas especializados

Jonatás Gago, quinto pola esq., brindando cos xornalistas.
photo_camera Jonatás Gago, quinto pola esq., brindando cos xornalistas.
O Consello Regulador da Denominación de Orixe Monterrei (C.R.D.O.) vén de recibir a visita de cinco xornalistas especializados no viño como parte da súa programación de actos promocionais para este ano 2024

Deste xeito, o pasado fin de semana estiveron desfrutando desta comarca vitivinícola e coñecéndoa de primeira man Alberto Zapata Rodríguez (director de ‘Dichosa Cocina’ de RTVE), Ana Eugenia Gómez González (redactora de contido en Bodeboca), Cristina Villar Martín (xestora de enoturismo de VinoSelección), José Antonio Muñoz Coromina (director e editor da revista Traveling) e Laura López Altares (redactora da revista MiVino).

Os convidados, expertos no xornalismo adicado ao mundo do viño, puideron participar en diversas actividades relacionadas coa viticultura e o viño de Monterrei, como a visita ao lagar rupestre Xan Preto, e tamén a cinco adegas pertecentes á denominación: Ladairo, Gargalo, Terras do Cigarrón, Triay e Daniel Fernández.

En todas elas puideron coñecer os seus viñedos, instalacións e caldos más representativos. Ademais, tamén estiveron na acrópole de Monterrei.

Amosar o produto

Para o presidente da DO, Jonatás Gago, o obxectivo desta visita é que “os participantes descubriran in situ a tradición e cultura vitivinícolas de Monterrei, así como as súas características climáticas, terroir, tipoloxías do viño e de traballo”.

Alén disto, Gago destaca que “este tipo de actividades permite amosar o produto de Monterrei de xeito íntegro, dende a vide ata a copa, así coma o traballo de viticultores e adegueiros da nosa comarca”.

Te puede interesar