"Emerxencia climática: feitos e datos", nova exposición no Museo de Verín

O Museo de Verín acolle ao longo do mes de agosto a exposición "Emerxencia climática: feitos e datos", unha exposición cedida polo Centro de Extensión Universitaria e Divulgación Ambiental de Galicia (Ceida) para achegar información científica contrastada que permita argumentar, debater e crear conciencia da necesidade de actuar ante a grave crise climática.

Á exposición xa acudiron diferentes grupos de cativos das ludotecas da comarca. Durante estas visitas, as novas xeracións amosaron a súa conciencia respecto á necesidade dun cambio e debateron sobre as diferentes opcións para conseguilo, dende as pequenas ás grandes accións.

"Emerxencia climática: feitos e datos", enfocada dende a educación ambiental e baseándose en información científica contrastada, pretende proporcionar os fundamentos básicos que argumentan a crise climática que vivimos.

O obxectivo último da mostra é achegar ao público aspectos básicos relacionados con este problema ambiental global para favorecer a súa comprensión, xerar procesos de reflexión e conseguir comportamentos dirixidos á acción para a mitigación e adaptación.

Así, o Museo de Verín reforza con esta iniciativa a súa programación en educación ambiental engadindo valor á estratexia pedagóxica que continúa dende a súa apertura e coa que pretenden mellorar as relacións das persoas coa súa contorna.

Para iso, trabállase a prol de dar a coñecer o valor patrimonial e cultural da comarca de Verín, sempre procurando estimular o coñecemento e a conversa e achegando o debate dos obxectivos da axenda 2030 á realidade diaria da súa veciñanza.

Para coñecer a exposición sobre o clima e outras que agocha o Museo de Verín -"O viño nos Camiños de Santiago", mostras sobre a Denominación de Orixe Monterrei, sobre á historia da comarca ou o licor café-, o horario de visitas é de mércores a sábado de 11,00 a 14,00 horas e de 17,00 a 20,00 horas, e o domingo de 11,00 a 14,00 horas.