Frasca do Terrón, viaxe ó folclore galego en Castrelo do Val

Volve a Frasca do Terrón, unha cita co folclore galego en Castrelo do Val. Organizado polo Concello en colaboración co grupo tradicional Candaira, o municipio acollerá o 4 de xuño a segunda edición desta festividade. Tras a parada obrigatoria pola pandemia, o espazo do Terrón volverá a ser protagonista: alí convivirán música tradicional, artesanía, gastronomía e variadas actividades culturais.

“A Frasca naceu para dar visibilidade aos grupos da comarca que están traballando todo o ano. Sempre imos fora a outras celebracións e tivemos a iniciativa de facer algo aquí, traballando para que este sexa o segundo de moitos máis anos e para impulsar a cultura galega”, explica Ramón López, concelleiro de Cultura e director de Candaira.

A xornada festiva comezará ás 10,00 horas para os máis deportistas cunha ruta etnográfica e arqueolóxica para “viaxar no tempo dende a Idade do Ferro ata principios do século XX”, sinalan dende a organización. E ás 11,00 horas é a quenda das bicicletas BTT pola ruta das Corgas, un percorrido de 16 quilómetros.

Tamén ás 11,00 horas se abre a feira de artesanía e ás 12,30 horas, as mulleres rurais da comarca e Candaira farán bailar aos presentes ao ritmo do folclore galego.

Xa pola tarde, haberá unha sesión de contacontos para os máis pequenos, da man do profesor Fran Guede, de 16,30 a 17,30 horas. A mesma hora, o concelleiro de Cultura impartirá un obradoiro de instrumentos pobres e pandeireta. Dende a organización quixeron contar co bailarín de As Tanxugueiras, Artur Puga, que impartirá un obradoiro de baile ás 17,30 horas. Seguindo coa actividade, de 18,00 a 20,00 horas haberá unhas clases de pádel para nenos.

Ata Castrelo achegaranse grupos de música tradicional da comarca e doutros puntos de Galicia para desfrutar, e facer que o público tamén viva, a cultura galega. Estes actuarán a partir das 19,00 horas e os pandereteiros de O Fiadeiro despedirán a Frasca do Terrón ás 23,00 horas.