O Concello de Verín vén de activar o seu plan especial de limpeza e desbroce das marxes do río Támega. Así, os operarios municipais comezan a traballar na primeira das súas fases estes días, que vai dende Tintores ata o centro de Verín e de Pazos a Queizás.
Os traballos efectuados dentro deste plan buscan a mellora da vexetación de ribeira do Río Támega mediante a retirada de árbores mortas do seu leito, retirada de vexetación invasora e desbroce selectivo nas marxes.
Gerardo Seoane, alcalde do municipio, explicou que "o obxectivo principal deste plan é favorecer o comportamento hídrico do Támega ó seu paso polo municipio e poder manter o seu caudal ecolóxico, sempre respectando en perfecto estado a biodiversidade, tanto do propio río como da zona as súas ribeiras".
O rexedor municipal tamén quixo recordar que o Concello de Verín conta con todos os permisos correspondentes dos organismos competentes -Consellería de Medio Ambiente e Confederación Hidrográfica do Douro- para realizar esta actuación.
Esta acción, para a que se investirán máis de 120 mil euros, está dividida en dúas fases. A primeira abarca os tramos entre a área recreativa de Tintores ata a ponte da N-525 ó seu paso por Verín, e desde a ponte de Pazos ata a futura ponte de Queizás. A segunda fase, que se executará en setembro, limpará as ribeiras do Támega ata a fronteira con Portugal.
Esta actuación forma parte do Plan Integral de Reestruturación e Saneamento de Verín, destinado a completar o correcto funcionamento do ciclo da auga do río Támega ó seu paso pola vila, para o que se dispón dun presuposto de 400.000 euros.
O proxecto divídese en tres grandes actuacións: a dita limpeza do Támega, a mellora do saneamento hídrico ó seu paso pola zona urbana e o saneamento nas aldeas do municipio.