A Mancomunidade de Verín di non á violencia machista este 25N

ACTIVIDADES REIVINDICATIVAS

O vindeiro 25 de novembro Verín acollerá diversas accións reivindicativas con motivo dese día, con actos e obradoiros organizados polo CIM

Cada par representa a unha muller vítima de violencia machista neste 2024 (foto: IES Castro de Baronceli)

O Centro de Información á Muller (CIM) da Mancomunidade de Verín, un servizo que presta atención aos concellos da comarca, deseñou unha completa programación para o vindeiro luns, 25 de novembro, día internacional da erradicación da violencia de xénero, con varias actividades reivindicativas.

Ese día, ás 12,00 horas, terá lugar a concentración comarcal frente ao Concello verinés, no que se lerá o manifesto do 25N, dinamizado polo CIM e as ONGs da contorna.

Ademais recrearase a obra “Zapatos vermellos”, baseada nunha exposición de Alina Chauvet, que representa ás mulleres que xa no están por ser vítimas de feminicidios, e que vén recreando en centros educativos de Monterrei.

Tamén se presentará a campaña de sensibilización “Por un mundo onde sexamos socialmente iguais, humanamente diferentes e totalmente libres”, co reparto de 600 bolsas deseñadas polo CIM.

Estas iniciativas únense á campaña de información e sensibilización sobre a violencia de xénero e os recursos de apoio que este servizo brinda a tódalas mulleres e familias que sofren esta lacra, e que buscan ser mecanismos de prevención contra as violencias machistas no futuro.

Contenido patrocinado