Os veciños de Castrelo de Cima, no municipio ourensán de Riós, contan os días para a celebración da súa tradicional Queimada. Cita que se celebrará este sábado e contará con numerosas sorpresas.
Este ano é especial pois, os veciños de Castrelo de Cima e a Asociación Os Queimas celebran a súa 50 edición. E coincidindo con esta data tan importante para eles, decidiron solicitar a declaración da festa da Queimada como Festa de Interese Turístico de Galicia. Unha cita que ano tras ano conta con máis participantes e vai gañando popularidade.
“Imos facer algo especial, porque queremos esa declaración, a través do Concello”, contan dende Os Queimas, que tratarán de “promocionar máis a festa, porque é algo arraigado a Castrelo de Cima”. Así, esta pequena aldea traballará por conseguir poñer o seu nome no calendario festivo de Galicia.
