A Veiga de Tintores, en Verín, estrea un roteiro interpretativo

O entorno da Veiga de Tintores, en Verín, xa conta cun sendeiro mellorado e un novo roteiro interpretativo. O Concello investiu nesta actuación unha partida de 20.432,92 euros -20.000 euros proceden da subvención financiada integramente polo Programa de Desenvolvemento Rural de Galicia 2014-2020, cunha achega do Fondo Europeo Agrícola de Desenvolvemento Rural (Feader) do 75 por cento-.

O obxectivo de dita intervención foi recuperar e poñer en valor o antigo sendeiro da Veiga de Tintores, que se atopa incluido na Rede Natura.

Dentro das accións realizadas e tal e como explicaron dende o Concello de Verín, integrouse medioambientalmente a antiga ponte que cruza o río Támega mediante a colocación de adoquíns e substituiuse, do mesmo xeito, o valado metálico por outro de madeira "en consonancia co ambiente no que se empraza". Ademais mellorouse o sendeiro que une a ponte coa pontiña sobre o rego do muíño existente e ubicáronse unha serie de carteis indicativos e divulgativos sobre os solos agrícolas e os aproveitamentos agrogandeiros nesta zona, xa que o tramo reformado do carreiro conecta a área de lecer e fluvial de Tintores con diversas parcelas agrícolas.

Segundo afirmou o rexedor de Verín, Gerardo Seoane, "a rehabilitación deste carreiro permitirá a interconexión da área de lecer de Tintores -incluso a ciclovía do Támega- coa outra marxe do río, no que o visitante poderá percorrer zonas de transición dun ecosistema fluvial con explotación agrogandeiras perfectamente adecuadas ao entorno".