O Centro de Información á Muller (Cim) da Mancomunidade de Monterrei xa traballa nas actividades enmarcadas no Día Internacional contra a Violencia de Xénero -25 de novembro-. Este venres impartirán un taller sobre ciberviolencia no IES Castro de Baronceli á mocidade de Educación Secundaria.
Esta iniciativa pretende crear unha ponte de conexión entre os recursos de asistencia e os centros educativos fomentando, así, a prevención primaria na mocidade. Os mozos coñecerán de primeira man as diferentes formas de ciberdelitos, a violencia de xénero exercida a través das redes e as implicacións legais de tales formas de violencia. Ademais, o Cim presenta a curta “Non caio nas túas redes”, rodada no instituto.
Estudo comarcal
Continuando coas actividades cara o 25-N, o luns, ás 17,00 horas, a Casa da Cultura de Verín acolle unha conferencia sobre un estudo da violencia de xénero na comarca: “Análise dende a perspectiva da adolescencia”.
O estudo, realizado polo Cim en colaboración coa Universidade de Vigo, é o resultado dun cuestionario sobre relacións amorosas, igualdade, violencia de xénero, co fin de analizar o tipo de intervencións educativas que a xuventude precisa. Dende a organización recomendan asistir á charla a pais, nais, educadores, axentes sociais e docentes, entre outros.
