O libro "Mudar o mundo. Na procura dun novo paradigma para uma humanidade", de Artur Afonso Novelhe, chega ao salón de actos da Casa da Cultura de Verín. O autor presentará a súa obra este venres, 12 de novembro, ás 19,30 horas.
"Transformar o estado de guerra, competencia, en que aínda habita a humanidade". Baixo esta premisa, Alonso Novelhe navega no seu libro a través das diferentes épocas históricas e as súas achegas a unha lenta, pero inevitable, transformación dunha humanidade focalizada na ganancia material, e que basea a súa supervivencia na dicotomía "dominar ou ser dominado".
O libro achega ao lector a unha civilización que vive baixo unha errada interpretación da clásica visión darwinista do dominio dos mellores adaptados ao medio, cun predominio da mente habilidosa e servidora do ego en detrimento dunha mente ética, ao servizo do ben común, da xustiza e a virtude, esquecendo as achegas de "Axuda Mutua" estudadas por Kropotkin.
O autor
Artur Alonso Novelhe naceu na cidade de México o 21 de xuño de 1964. Participou no Comité de Solidariedade coa América Latina e na Asociación Galega da Lingua. Exdirector do Instituto Galego de Estudos Internacionais e da Paz, integra o Consello Consultivo do Movemento Internacional Lusófono e o Grupo dos Poetas Vivos da Galiza, entre outras entidades.
Recibiu o XVIII Premio de Poesía “ Feliciano Rolán”, en 2004, na cidade galega da Guarda. Obtivo unha Mención especial do Xurado no XXVI Premio Mundial de Poesía Nosside, en 2010. Colabora en diversas publicacións e ten varios libros publicados: de poesía, teatro, prosa e ensaio.
