Os veciños da comarca de Monterrei concentraranse este mércores para reivindicar igualdade, no marco do Día Internacional da Muller. A cita será en Verín, cunha marcha que arrancará ás 12,00 horas dende a Praza do Concello para rematar na Praza Maior lendo un manifesto e realizando unha performance.
A cita está organizada polo Centro de Información á Muller da Mancomunidade, Femuro, o CDR Portas Abertas e Cruz Vermella. As entidades implicadas reivindicarán a igualdade entre mulleres e homes en todos os ámbitos.
Máis alá desta xornada, Femuro está realizando actividades coas asociacións de mulleres rurais e cos cativos. “Coas mulleres estamos facendo un vídeo reivindicativo, ademais de que temos organizadas unhas andainas nas comarcas de Monterrei, Ribeiro, Valdeorras e A Limia”, explican dende a Federación.
Esta entidade tamén está traballando cos cativos do CEIP Amaro Refojo na performance que realizarán o 8M na Praza Maior, así como con charlas de sensibilización neste centro e no CEIP Carlos Casares de Xinzo de Limia.
Este ano, Femuro centra as conferencias, a sensibilización en redes sociais e as súas actividades na corresponsabilidade, baixo o lema “Hai moito tempo que non varres a cociña” para “crear conciencia sobre a necesidade de establecer medidas que faciliten a conciliación da vida laboral e persoal”, conclúen.
