Verín mobilízase para lograr 19 millóns de tapóns para Valeria

Verín estáse a converter na capital do tapón de plástico. E máis que chegará a selo logo de que onte a Fundación Amigos de Galicia presentase públicamente unha nova campaña de recollida para financiar o tratamento de atención fisioterapéutica da pequena Valeria, que dende hai sete anos padece dificultades de mobilidade e na linguaxe.

Onte quedou inaugurada unha nova tempada da loita que seguen dous abnegados pais, neste caso para satisfacer o custe duns 10.000 euros do tratamento que a súa filla recibe agora nunha clínica especializada ourensana, logo dunha importante peregrinaxe por outros centros públicos e privados. Non estarán sós, porque amáis da colaboración do público en xeral, neste caso e por primeira vez o Concello de Verín aportará un trinta por cento desa cantidade. Esta campaña enmárcase dentro do convenio de colaboración asinado entre o Concello de Verín e a Fundación Amigos de Galicia para axudar ás familias do municipio en situación de necesidade.

Para facerse cargo do custo dun ano, son necesarios 41.533 kg de tapóns, pero recentemente finalizou a campaña "Tapones para Nahir" (unha nena de Pontevedra con tetraparesia discinética e parálise cerebral infantil) e a entidade xa dispón de 14.400 kg para esta nova campaña, necesitando por tanto 27.133 kg a maiores. Esta cantidade tradúcese en 19 millóns de tapóns.

A Fundación Amigos de Galicia atende ás familias do municipio que teñen graves carencias económicas e cobre as súas necesidades básicas coa repartición de alimentos, roupa ou material escolar.

Desde xaneiro do 2016 ata novembro, a Fundación Amigos de Galicia atendeu en Verín unha media de 25 familias, adultos unha media de 58, e menores unha media de 15. A axuda achegada a día de hoxe no Concello desde que comezou o ano é de 41.942 euros.

Sete anos de loita contra a enfermidade

Valeria naceu fai sete anos mediante cesárea programada xunto ao seu xemelgo Hugo. A pequena sufriu dificultades de respiración no nacemento, con todo non foi ata os primeiros meses de vida cando comezaron a facerlle probas médicas. Os seus pais decatábanse que a evolución da pequena era máis lenta que a do seu irmán, pero o prognóstico da cativa, despois de moitas probas en diferentes centros de España, aínda é descoñecido. A Seguridade Social non lle cobre ningún tratamento para que poida mellorar a súa calidade de vida, e por ese motivo, a Fundación Amigos de Galicia comeza esta campaña con ela. Poden atoparse os puntos de recollida na páxina web da entidade, e anímase a establecementos, colexios e cidadanía de Ourense a converterse en puntos de recollida.