Máis de 20 cervexas nacionais e internacionais poderanse degustar na primeira edición da Feira da Cervexa de Verín, que chegará á capital do Támega os vindeiros días 8 e 9 de outubro. Ademais, neste evento, no que non faltarán actuacións musicais -Mitic e Ortiga serán os pratos fortes- e animación infantil, os restaurantes mesturarán a comida galega coa gastronomía alemá.
O evento terá lugar na nova zona verde da Preguiza e contará cunha carpa de 20 por 80 metros, dun aforo de 450 persoas, na que estarán colocados os postos de bebidas e alimentación. O horario da feira será o venres de 19,00 horas a 23,00 horas, e o sábado de 12,00 horas a 16,00 horas e de 19,00 horas a 23,00 horas.“Coa situación sanitaria xa estabilizada, o Concello retoma con forza a súa axenda organizando eventos temáticos de gran calidade”, asegurou o rexedor local, Gerardo Seoane.
