O Concello de Verín xa ten todo listo para desenvolver, un ano máis, os seus programas de conciliación da vida familiar e laboral durante os meses de verán e vacacións escolares. Ofrecen tres servizos diferentes: a Ludoteca de verán, o Campamento urbano e as Escolas deportivas de verán.
A Oficina Municipal de Información Xuvenil (Omix) xa ten aberto o prazo de inscrición para a Ludoteca “Convive en Igualdade” e o Campamento, destinadas a nenos de entre 3 a 10 anos no caso do primeiro programa e de 11 a 15 anos para o Campamento. Comezarán o 22 de xuño e prolongaranse ata o 8 de setembro, de luns a venres con diferentes horarios adaptados ás idades dos nenos e contando cun equipo cualificado de nove monitores de tempo libre, doce mozos voluntarios e persoal en prácticas. Os prezos e horarios son variados.
Desta maneira a Omix ofrece dous servizos para a cativada e mocidade da contorna. A Ludoteca de verán conta con actividades como animación á lectura, xornadas acuáticas, cine infantil e obradoiros medioambientais. Mentres, o Campamento urbano desenvolverá acampadas nocturnas, sendeirismo, xogos olímpicos e actividades acuáticas.
Deporte e ocio
As Escolas deportivas “Convive en Igualdade” organízanse dende a área de Mocidade do Concello, quen veñen de abrir o prazo de inscrición formal. “Este servizo é unha iniciativa lúdico-deportiva que xa cumpre a súa XV edición e que está ideada para nenos nados entre o 2009 e o 2019”, sinalan dende a organización.
Os usuarios terán un amplo servizo, en horario de 08,00 a 14,30 horas de luns a venres ocupando todo o período vacacional da escola. A tipoloxía de actividades deste programa baséase en xogos coeducativos de igualdade e actividades deportivas variadas, acompañado doutras actividades complementarias como cine, teatro, obradoiros, piscina, bailes e actividades propias de ocio e recreación.
