Homenaxe na Festa da Palabra a Arcadio López

A Fundación Insua dos Poetas organiza esta 15ª edición na que se rendirá homenaxe a Arcadio López - Casanova (Lugo 1942 - Valencia 2022). Foi poeta, profesor e investigador, entre outras facetas profesionais, ademais de ser un gran amigo do presidente da entidade organizadora do evento e impulsor da Insua dos Poetas, Luis González Tosar, quen se refire ao homenaxeado lembrando a súa estancia na Insua coincidindo coa celebración dos 150 anos de “Cantares Galegos”.

O acto terá lugar ás 11,30 horas e ademais da homenaxe a Arcadio López - Casanova tamén se entregarán os premios Insua dos Poetas, que decidirá a fundación na súa próxima reunión días antes da Festa da Palabra.

Os galardóns recoñecen o labor literario, a conservación do medio ambiente, a promoción da cultura e a lingua no exterior, a traxectoria dunha entidade cultural e deportiva do Carballiño e tamén un premio á iniciativa empresarial, entre outros.

No transcurso da celebración haberá tamén música en directo a cargo de Aurum Ensemble e Airiños de Candelas e descubrirase a obra do artista ourensán Antón Pulido, que será a 15 peza escultórica que pasará a formar parte deste parque natural e cultural que é a Insua dos Poetas.

Ademais, os asistentes tamén poderán participar nun xantar de irmandade na ourensanía, segundo Luis González Tosar.