A MIT deseña o seu cartel con imaxes das pasadas edicións

A Mostra Internacional de Teatro de Ribadavia (MIT) celebra o seu 35 aniversario e con tal motivo presenta un cartel deseñado por A&B Comunicación e Deseño, que recolle imaxes de compañías galegas e internacionais e mostra "o impulso e proxección que tivo para o teatro galego un festival humilde pero entusiasta, con raíces pero igualmente con forza para voar", segundo apuntan os organizadores.

Engaden, que no cartel, a persoa espectadora poderá atopar imaxes de cada edición, dende 2009 (ano en que se celebrou o 25 aniversario) ata hoxe, "coma un peche de ciclo do festival, que se caracterizou por un impulso profesionalizador, por reforzar o seu rol de diálogo internacional no teatro galego e por achegar a Galicia a grandes mestres da escena mundial", sinala.

A Mostra Internacional de Teatro de Ribadavia quere así, tamén, "dende a ledicia do recordo, o respeto e a festa, lembrar e recoñecer todo o legado das persoas ligadas a este festival e que nos deixaron nestes 10 últimos anos: Bobò, Ernesto Chao, Xosé Manuel Olveira "Pico", Miquel Gallardo, Eimuntas Nekrosius ou Xan Cejudo", destacan os organizadores.