Saneamento renovado no Noallo de Abaixo, en Castrelo

O Concello de Castrelo de Miño vén de concluir unha serie de obras de renovación das redes de saneamento e abastecemento no núcleo de poboación de Noallo de Abaixo, na parroquia de Barral.

As intervencións tamén incluíron a mellora e embelecemento do campo da festa, así como no entorno da capela e do centro cívico deste lugar do municipio.

Estas obras contaron cun investimento cercano aos 40.000 euros, unha achega froito da colaboración coa Xunta de Galicia.

O obxectivo das mesmas foi o de preservar e coidar o medio ambiente a través da renovación das canalizacións e tuberías das redes de saneamento e abastecemento, de forma que se eviten verteduras, e minimizando no posible as perdas de auga potable por roturas debido ao deterioro normal polo paso dos anos nestas infraestruturas.

Servizos de calidade

O Concello castrelao busca con estas actuacións velar polo medio ambiente, de xeito que sirvan para mellorar a calidade de vida da veciñanza, ofrecendo servizos de calidade que poidan asentar poboación no medio rural. Estas actuacións enmárcanse dentro de dous plans de actuación do goberno local para a mellora do saneamento e abastecemento.