Entre o 12 ao 14 de abril, ten lugar no recinto ferial de Expourense, o VI Car Outlet Ourense que ofrecerá as mellores oportunidades do mercado de vehículos de ocasión e segunda man con todas as garantías que brindan os concesionarios oficiais. Trátase dunha cita coorganizada entre Expourense e a Asociación de Concesionarios de Automóbiles de Ourense, Acauto, que reunirá a un total de 24 marcas representadas a través de 15 concesionarios asociados.
Trátase dunha cita vencellada a un dos sectores comerciais de maior peso na nosa contorna, o da automoción, no que se reunirán máis de 400 coches con ofertas moi especiais. O obxectivo desta cita é cubrir todas as gamas e modelos para adaptarse ás necesidades e preferencias dos clientes ao mellor prezo. O público poderá consultar nun mesmo espazo distintas opcións de coches de oportunidade no mercado ourensán, e comparar in situ antes de decidir a compra.
O VI Car Outlet de Ourense presenta a mellor oferta en Galicia en vehículos de ocasión, seminovos, xerencia e kilómetro cero que contan con inmellorables condicións, xa non só no prezo, senón tamén de financiamento, seguros ou outros servizos engadidos, e, por suposto, coa garantía e solvencia que ofrecen os concesionarios oficiais. Ademais, este tipo de vehículos véndense con entrega inmediata.
Este evento ofrece ata 400 vehículos que representan os catro eixos do mercado de ocasión: os kilómetro cero (novos que se venden así por obxectivos comerciais que indica o fabricante); vehículos de servizo (demostración ou cortesía) con antigüidade de ata 1 ano e con 15.000 kilómetros de media; seminovos (ata 5 anos de froito de renting empresarial ou operacións financeiras con garantía de recompra); e o de ocasión (que foi empregado por un particular e entregado no concesionario a cambio doutro).
Balance
O 2023 concluíu como un ano máis positivo que o 2022 para a automoción ourensá. En todo o ano pasado comercializáronse na provincia 14.846 turismos, un 2% máis que os 14.538 do 2022. Isto débese, principalmente, ao subidón experimentado polos vehículos novos, cuxas vendas se incrementaron preto dun 16% en Ourense no último ano. Neste apartado, o mercado automobilístico ourensán expandiuse por encima da media autonómica (creceu un 9,7%), aínda que por baixo da estatal (16,7%).
O aumento das matriculacións viuse esporeado polo cada vez maior peso das compras de vehículos con combustibles diferentes ao gasóleo ou a gasolina. No ano no que se acaba de pechar representaron case un 48% das novas inscricións, seguidos polos de motor a gasolina (40%) e, moito máis lonxe, os de motor a diésel (12%).
O horario de apertura do salón será hoxe 12 de abril de 11,00 a 20,30 horas, o sábado 13 de 10,00 a 20,30 h. e o domingo 14 de abril de 11,00 a 20,00 horas. A entrada terá un custo de 3 euros, sendo gratuíta para os menores de 12 anos. Para facilitar a elección do vehículo, o salón conta con servizo de ludoteca gratuíto.