Máis de 400 coches de ocasión estarán á venda en Expourense

Máis de 400 coches de ocasión e segunda man sairán á venda esta fin de semana en Expourense. Foi a cifra que aportaron os organizadores do VI Car Outlet Ourense, que se desenvolverá entre mañá e o domingo, nunha presentación que tivo lugar onte no recinto feiral.

No acto interviron a xefa territorial da Consellería de Economía, Alicia López; o director xerente de Expourense, Rogelio Martínez, o presidente da Asociación de Concesionarios de Automóbiles de Ourense (Acauto), Ramón Seijas, e o vicepresidente, César Fernández Mosquera.

O parque automobilístico ourensán é o máis envellecido de todo o Estado, segundo os últimos datos dispoñibles, cunha idade media de máis de 17 anos. Por iso, dende a organización trasladaron que se trata dunha “boa ocasión” para rexuvenecer este parque aproveitando as ofertas dispoñibles nesta cita. Haberá vehículos quilómetro cero, seminovos, de xerencia e de segunda man. A franxa de idade con maior demanda son os automóbiles de entre 3 e 7 anos, polo que terán unha notable presenza no salón.

No Car Outlet participan 15 concesionarios asociados de Acauto. Exporán vehículos pertencentes a un total de 24 marcas, segundo cifraron onte dende a organización. O salón abrirá mañá de 11,00 a 20,30 horas; o sábado, de 10,00 a 20,30 horas, e o domingo, de 11,00 a 20,00 horas. A entrada custa 3 euros e é de balde para os menores de 12 anos. Ademais, haberá un servizo de ludoteca gratuíto a disposición dos visitantes.