Manuel Reigosa: " O campus de Ourense será o que máis medre da Uvigo, imos darlle un pulo maior ao que xa ten”

Manuel Reigosa, actual reitor da UVigo, é o único candidato ás eleccións á reitoría que se celebran o próximo 4 de maio. De ser elixido, afrontaría outros catro anos á fronte da institución académica. Polo de agora, só se coñece que liderará a lista H2040, sin que se coñezan as súas apostas de equipo de goberno nin a existencia de rivais. Na súa visita ao Campus de Ourense, onte, confirmou que haberá cambios que afecten ao Campus de Ourense, cuxa actual vicerreitora é Esther de Blas.

A súa é a única candidatura á reitoría. Que cambios se presentan?

Estou con moita ilusión, o balance destes catro anos é positivo. Imos darlle un pulo moito maior ao que xa ten ao Campus de Ourense, probablemente vai ser o campus dos que máis medre da UVigo. Ourense será o campus chamado a medrar. Estamos enormemente ilusionados coa candidatura, aínda non teño preparado o equipo e o programa, pero haberá novidades nas liñas básicas.

Xa ten algún rival?

Non sei nada, pero espero que si. Paréceme moi bo que haxa outro punto de vista e ver que podemos facer. Polo de agora non coñezo quen vai ser o meu ou a miña rival, pero espero que o haxa.

Como vai medrar o Campus de Ourense?

Estamos inmersos co grao e o mestrado de Intelixencia Artificial, así como a nova aposta de Relacións Internacionais. Esperamos tamén que haxa algún mestrado máis para Ourense. Igualmente, esperamos que haxa unha valoración positiva da acreditación do Campus Auga, xa está toda a documentación preparada e todo presentado pola nosa parte. Queda saber que din os avaliadores, pero o Campus Auga será un sinal de identidade do Campus de Ourense.

No Campus Auga hai un cento de investigadores traballando. Hai certa preocupación por como lles afecta a nova reforma laboral…

Efectivamente. Nalgunhas cuestións xa estamos arranxando, pero noutros casos temos que buscar solucións aínda para os investigadores. Precisamos dalgunhas aclaracións do Ministerio de Universidades, pero a vicerreitoría nosa xa está barallando opcións para estes científicos.

Sobre todo para que non queden na rúa estes investigadores, non?

Claro.

Non ten o equipo formado, pero barallará nomes para as vicerreitorías, como a do Campus de Ourense… Incluso a reelección de Esther de Blas?

Estou enormemente satisfeito e agradecido co meu equipo, pero o que pasa é que para a seguinte presentación haberá que ter algunhas novidades. Aínda non podo adiantar nada, pero haberá certos cambios.

Haberá cambios, entón, en Ourense?

Si, haberá cambios. Sempre ten que haber.