Un médico rural de Allariz gaña o Premio Blanco Amor de novela longa

Roberto Fernández Álvarez (Ourense, 1967), médico de Atención Primaria en Allariz, é o gañador do XLI Premio de novela longa Eduardo Blanco Amor que outorga a Deputación de Ourense en colaboración coa Fundación Eduardo Blanco Amor, dotado con 15.000 euros, unha peza escultórica de Acisclo Manzano e a publicación do libro. Álvarez presentou a obra “A inmoral doutora Cons”, baixo o pseudónimo de Carme Leonor Friedmann.

A novela foi seleccionada de entre un total de 25 orixinais presentados. O xurado, reunido onte no Centro Cultural Marcos Valcárcel, destacou a “habilidade do autor para reconstruír un tempo pasado” -a década dos 50 do século XX- e “o retrato certeiro do rural galego, cun matiz ourensán, fronte á perspectiva dunha médica que chega de fóra e que loita con valentía para desbotar prexuízos instalados naquela sociedade, principalmente no eido sanitario”. Ademais, o xurado destaca o “tratamento acaído da perspectiva de xénero, a construción dos personaxes e o bo manexo dos diálogos, con acenos próximos á obra de Eduardo Blanco-Amor e Álvaro Cunqueiro”. O xurado, que tralo seu fallo estivo acompañado polo vicepresidente segundo da Deputación, César Fernández, foi presidido por Luís González Tosar, en representación da Fundación Blanco-Amor, e integrado por Elba Pedrosa, Mario Regueira, Tensi Gesteira e Maite Jiménez. O gañador recibirá o premio o sábado, ás oito da tarde, no Liceo.

Roberto Fernández é o autor do ensaio “Enfermos pobres, médicos tristes”, gañador do premio Vicente Risco de ciencias sociais.