Un novo libro achega a historia de Ben Cho Shey aos pequenos

Paco López Barxas presentou onte en Ourense “Os segredos do bosque de Ben-Cho-Shey”, o seu novo libro infantil ilustrado por Acisclo Manzano. Como o seu propio nome indica, trátase dunha obra que xira arredor da figura do escritor ourensán Ben Cho Shey, seudónimo que empregaba Xosé Ramón Fernández Oxea dende que comezou a escribir para o xornal La Zarpa en 1922.

A idea deste conto xurdiu no colexio de Pereiro de Aguiar, durante a presentación dun ensaio que López Barxas escribiu sobre este autor con escritos e cartas que el mesmo lle deixou. “Os profesores do centro propuxéronme adaptar o traballo para os máis pequenos”, sinala o escritor, que non dubidou en aceptar a proposta.

Así, o propio colexio que leva o nome de Ben Cho Shey e o bosque que está ao seu carón, tamén coa mesma denominación, convertéronse no escenario perfecto para narrar a historia deste escritor mediante unha biografía ficcionada, aínda que López Barxas asegura que “a vida de Ben Cho Shey foi como un conto”.

Loaira e Lislé son as personaxes protagonistas que un día durante o recreo deciden adentrarse entre as árbores. Alí, nese bosque encantado, atópanse con Ben Cho Shey, pero tamén co Padre Feijoo e o Coronel Cachamuíña, mentres preparan un maio. O conto fai posible que estes tres persoeiros, que están ligados á historia de Pereiro de Aguiar, coincidan no tempo para trasladar aos nenos unha parte da historia da súa contorna.

Acisclo Manzano foi elixido como ilustrador para trasladar á historia o carácter máxico que teñen as súas esculturas. “O día que fun ao CEIP Ben Cho Shey, en Pereiro de Aguiar acababa de amencer e había néboa, automaticamente fixo que pensase na obra de Acisclo e por iso quixen contar con el para este proxecto”, explica López Barxas.

Non é a primeira vez que o autor relata de forma educativa a historia doutros autores. Xa o fixo cos homes da Xeración Nós, como é o caso de Ramón Otero Pedrayo, do que escribiu un conto que se chama “Historia de Ramón”. O seu próximo traballo tratará sobre o Pórtico da Gloria e estará ilustrado por Alfonso Costa.