Ourense, a cidade na que se fala máis galego ca castelán

Segundo a enquisa estrutural a fogares realizada polo Instituto Galego de Estatistica (IGE) sobre o coñecemento e uso do galego, a cidade de Ourense é a que rexistra unha maior porcentaxe de habitantes que empregan o galego por riba do castelán no seu día a día (29,66%). O dato sitúase lixeiramente por riba do recollido no 2008, cando o 28,11% dos enquisados aseguraban un uso prioritario da lingua galega, unha boa noticia tendo en conta que as anteriores dúas enquisas -realizadas en 2013 e 2018- rexistraban un descenso do uso prioritario do galego (22,40% e 22,80%, respectivamente).

Só Lugo (39,22%) supera lixeiramente a Ourense (37,89%) entre as urbes con máis habitantes que falan habitualmente en galego -tendo en conta aqueles que o empregan sempre e os que o priorizan ante o castelán-. Mentres tanto, Vigo é a cidade con menos veciños que falan sempre en galego (3,91%), cun descenso de case tres puntos con respecto ao 2008 (7,09%).

A maioría dos galegofalantes (79,10%) aprenderon o idioma no ámbito familiar -en 2018 eran un 83,36%-, aínda que debullando o dato por idades son os maiores os que xustifican o resultado. Os máis xovenes -entre 5 e 29 anos- sinalan a escola como o lugar no que máis lles ensinaron a lingua galega. É dentro deste grupo de idade onde se percibe unha maior perda do galego, cun aumento de case 10 puntos das persoas de entre 5 e 14 anos que falan só castelán nos últimos cinco anos.

Outro dos aspectos analizados polo IGE nesta enquisa é a percepción que teñen os propios enquisados sobre o coñecemento e uso do galego. O 29,66% da poboación de Ourense de 16 ou máis anos considera que o idioma se emprega bastante, fronte ao 39,15% dos habitantes de Pontevedra que consideran que se usa pouco ou nada. Con todo, no conxunto de Galicia o 25,87% da poboación considera que na actualidade se fala máis galego que hai 5 anos, para o 49,02% a percepción do uso do galego non variou neste intervalo de tempo e, finalmente, o 25,12% restante cre que se fala menos galego que no ano 2018.