O cinema gravado en Ourense co apoio da Deputación de Ourense, protagonista dos Premios Mestre Mateo desta noite
Ourense acolle esta noite a entrega dos premios Mestre Mateo, froito da colaboración da Deputación de Ourense coa Academia Galega do Audiovisual e enmarcada na estratexia desenrolada polo goberno provincial para potenciar o sector audiovisual na provincia de Ourense. Unha liña de traballo que, como afirma o presidente da Deputación, Manuel Baltar, “levou a un 2022 histórico, cunha decena de rodaxes e ata seis producións gravadas dun xeito simultáneo”. Eixes importantes neste obxectivo son a consolidación do OUFF como o “festival de cine de Galicia” ou a implementación da Ourense Film Commision, “nun posicionamento referencial de Ourense dentro da industria audiovisual que leva a acoller os Mestre Mateo ou o programa para guionistas e produtores ‘European Writers Club”.
O cinema gravado en Ourense co apoio da Deputación suma 26 nominacións aos XXI Premios Mestre Mateo. “O corpo aberto” é a película máis seleccionada nesta edición polos académicos (16 candidaturas), nunha lista de películas nominadas co apoio do goberno provincial completada por “O home e o can” (4), “Live is life” (4) e “Valentina” (2).
Audivisual con selo ourensán
Dentro da ampla presenza de filmes con selo ourensán entre os candidatos destaca a categoría de mellor película, onde tres das catro películas contan co patrocinio do goberno provincial e foron gravadas na provincia: “O corpo aberto”, “O home e o can” e “Live is life”. As tres longametraxes foron estreadas no Festival de Cine de Ourense.
“O corpo aberto”, de Ángeles Huerta, posiciónase coma a gran favorita para a gala dos Mestre Mateo. A película parte dun conto titulado “Lobosandau”, o primeiro dos dez relatos que integran o libro “Arraianos” de Xosé Lois Méndez Ferrín, e está gravada en Lobeira, Bande e Muíños. Ademais da mencionada nominación a mellor película, suman candidaturas a súa directora; actores como Tamar Novas, María Vázquez, e Victoria Guerra; e en boa parte das candidaturas técnicas.
“O home e o can”, de Ángel de la Cruz, suma catro candidaturas: ademais de mellor película compite en mellor guión, mellor actor principal -Manuel Manquiña-, e mellor dirección de fotografía. O filme é un drama que conta unha emotiva historia arredor da soidade dos maiores e o abandono do rural, con escenarios nun pequeno pobo de San Cristovo de Cea e unha vintena de lugares seleccionados da capital ademais das escenas rodadas no polígono de San Cibrao das Viñas.
“Live is life”, de Dani de la Torre, compite en mellor película e nas categorías de mellor montaxe, vestiario e dirección de arte. O filme está ambientado na Galicia de mediados dos anos 80 e foi rodado na Ribeira Sacra.
Por último, “Valentina”, de Ángeles Loureiro, está nominada á mellor película de animación desta edición dos Mestre Mateo despois de gañar o Goya en 2022. Ademais, este filme patrocinado pola Deputación tamén é candidata á mellor música orixinal, de Nani García.
Segundo Manuel Baltar: “Estas nominacións volven a acreditar os froitos do traballo realizado para converter a Ourense no mellor plató de cine de Galicia”.
Na pasada edición do OUFF puideronse visionar as xa citadas “O home e o can” e “O corpo aberto” e outras como “A mazá de ouro”, de Jaime Chavarri, “El tirabeque”, “13 exorcismos”, “Honeymoon”, “Amigos hasta la muerte” ou o primeiro capítulo de “Motel Valkirias”, ademais de proxectos con ADN ourensá como o documental “Peregrinas” de José Antonio Vázquez Taín.
Un dos eixes clave nestre proceso foi a Ourense Film Commission, presentada no marco do Festival Internacional de Cine de Ourense. “Unha ferramenta nacida despois de anos de traballo coa que seguiremos tecendo todas as nosas potencialidades, favorecendo e impulsando ao sector audiovisual como axente dinamizador desta provincia”, segundo sinalou Manuel Baltar. “A estratexia tivémola clara desde o inicio, aglutinar os impulsos ao audiovisual creando un estudado paquete de estímulos ás rodaxes e coordinar esforzos para converter a Ourense nun gran estudio de películas e series. Máis de catro anos despois, con máis de dúas decenas de proxectos completados, podemos dicir que acertamos e vamos polo mellor dos camiños”.
A segunda parte de “Cuñados”
Neste contexto, a Deputación de Ourense colabora na rodaxe da segunda parte da película “Cuñados”, que comezará nos vindeiros días. O obxectivo da produtora é estrear a longametraxe nunha das galas da 28 edición do Festival Internacional de Cine de Ourense. Manuel Baltar expresou a súa satisfacción polos primeiros pasos dun novo proxecto audiovisual “que seguro terá o tremendo éxito que tivo a primeira parte e representará a ese Ourense no que cremos todos”.
