O PP pide a recuperación dos camiños tradicionais de Ourense

O PP defenderá no pleno ordinario de decembro, que se celebra este venres, unha moción para solicitar ao goberno local que inicie un proxecto de recuperación dos camiños tradicionais de Ourense, identificando cada un deles, coa intención de recuperalos para todos os usos posibles, incluídos o acceso a fincas, a prevención de incendios e o fomento do uso lúdico e turístico.

Os populares están a recibir por parte da veciñanza queixas en relación coa carta remitida polo Concello aos titulares de fincas, recordándolles as obrigas que teñen como propietarios para a xestión da biomasa de cara ao mes de maio, pois moitos manifestan que ven complicado cumprir a normativa vixente por factores alleos, en gran medida derivados da falta de actuación do Concello.

“A veciñanza está cumprindo coas súas obrigas, pero en moitos casos, o que nos trasladan é que, paradoxalmente, son os camiños públicos os que están nun estado de tal abandono que impiden o acceso ás fincas que teñen a obriga de manter limpas”, explica o edil Pepe Araújo.