O PSdeG reivindica en Trives os fondos Next Generation

O PSdeG-PSOE ourensán fixo campaña onte na Pobra de Trives. Alí, os socialistas reivindicaron os traballos que se están a levar a cabo no municipio cos fondos europeos Next Generation, destinados a un proxecto de rexeneración e mellora da Praza de Abastos, así como o establecemento dunha rede wifi.

A candidata socialista de Ourense ao Parlamento Europeo, Lorena Guerra, visitou o concello xunta outros cargos do partido e da comarca. Guerra salientou o papel da rede wifi, “que facilita o teletraballo e a utilización das novas tecnoloxías por parte da veciñanza”. Ademais, incidiu en que Trives “é exemplo das boas telecomunicacións e da adecuación do municipio aos tempos que corren, cunha rede WIFI pública e totalmente gratuíta para uso e desfrute da veciñanza e dos turistas no casco vello do municipio e na rúa San Martín”.

Por outra banda, os socialistas destacaron as obras da Praza de Abastos da vila trivesa, que comezaron hai mes e medio. Guerra manifestou que “é un fito significativo para a localidade”, que recibiu unha subvención do Ministerio de Industria, Comercio e Turismo de case 369.000 euros para investir “na revitalización do comercio local”. A candidata cualificou Trives de “exemplo” en canto aos beneficios dos fondos, “e tamén amosa a importancia que ten que os concellos presenten proxectos para optar” a telos.