“Este é un recoñecemento para o noso instituto”, no Otero Pedrayo

Catro estudantes de 2º de Bacharelato do Instituto Otero Pedrayo recollen hoxe dous premios polos seus traballos dedicados á obra e vida do ilustre escritor e investigador que dá nome ao seu centro de estudos. Todas elas presentaron datos inéditos vencellados á figura do intelectual galeguista. Concretamente, Lucía Gómez foi premiada na categoría individual por facer un estudo titulado “Poesía e Xeografía de Bocarribeira”. No documento, afóndase na importancia da xeografía de Amoeiro, a partir de dito poema. Pola súa banda, Celia Rodríguez Fernández, Nerea Rodríguez Andrade e Lidia Rodríguez Domínguez foron galardoadas na categoría grupal pola súa análise de Ramón Otero Pedrayo como alumno no centro que era entón o Instituto Provincial e que agora ten o seu nome.

Orgullo inesperado

Estas alumnas recibiron a condecoración polo seu esforzo de investigación “de forma inesperada”. Lucía Gómez, estuda o bacharelato de excelencia. Esta modalidade “implica máis horas e traballos de investigación que nos preparan para a universidade”, indicou. Con esta motivación, Gómez inspirouse para realizar o traballo sobre o poemario. “Aproveitei que o tiña feito e presenteino a estes premios. A verdade é que aínda non mo creo”, relatou.

Para a estudante, estes premios son relevantes a nivel persoal, xa que quere dedicarse a “chegar a impartir docencia en galego”, indicou. Tamén expresou o desexo de ter unha conversa co ex presidente da Real Academia Galega, Xesús Alonso Montero, o cal acudirá ao acto de entrega de premios. “Para min é todo un honor coñecelo”, indica a galardoada individual.

Unha situación similar viviron Celia Rodríguez Fernández, Nerea Rodríguez Andrade e Lidia Rodríguez Domínguez. A “sorpresa” de ser gañadoras “vino por sorpresa” e aínda están “asimilando la noticia”. Así pois, segundo a portavoz do grupo, Celia Rodríguez, reciben o premio como un “orgullo para la imagen del instituto”, indicou. “Es un reconocimiento a nuestro trabajo, pero más para el instituto, que es el que tiene un importante archivo histórico sobre el escritor y eso merece visibilización”, expresou.

Crecemento persoal

Para as premiadas, facer estes traballos de investigación afectoulles a nivel persoal. Celia Rodríguez indicou que, para ela, o máis significativo foi aprender que “la vida te va llevando a donde tienes que ir. Investigar la vida de Otero Pedrayo te enseña eso”, indicou. Pola súa banda, para Lucía Gómez implicou mellorar a aprender a facer “unha investigación”, comentou. “Ao comezar a experiencia non sabía nin por onde comezar e agora síntome moito máis reforzada e confiada para facer un traballo na universidade, por exemplo.”