Unións Agrarias demanda á Xunta máis fondos para compensar a subida de custos na carne de vacún, criticando a exclusión do 35% dos produtores e abogando por un reparto xusto das axudas.
O sindicato Unións Agrarias esixiu onte á Xunta habilitar “orzamento suficiente” para compensar a suba de custos de produción en todo o sector produtor de vacún de carne. Nunha rolda de prensa celebrada en Ourense, celebraron que a administración autonómica habilitara fondos para apoiar aos produtores da IXP Tenreira Galega Suprema, pero lamentaron os criterios escollidos, que “deixan fóra non só ás explotacións que traballan á marxe da IXP, senón tamén ao 35% dos becerros criados dentro dela”.
Dende o sindicato lembraron que a suba de custos de produción afecta do mesmo xeito á totalidade das explotacións, e lamenta que a administración dea as costas ao 65% do sector limitando o seu apoio á produción de Ternera Gallega Suprema. Ademais, esta IXP certifica 55.000 becerros, pero inscribe 80.000, o que deixa ao 35% da produción amparada na IXP fóra desta liña de axudas, “penalizando ás explotacións que apostan pola recría e, en definitiva, por tentar medrar e polo futuro do sector”. “Poñemos en cuestión e entendemos que non é xusto o sistema de reparto escollido, ese é o único problema que lle vemos a estas axudas”, incidiron.
Así, a organización fai un chamamento para que o apoio público chegue á totalidade do sector e insta á Consellería a manter as liortas partidistas e sindicais á marxe da IXP.
